टिकौलीको जंगलमा कलेज बस र शव बोकेको भ्यानसहित ८ सवारी ठोक्किए

काठमाडाैं । चितवनकाे भरतपुर महानगर र रत्ननगर नगरपालिकाबीच पर्ने टिकौली जंगलमा ८ वटा सवारी एकापसमा ठोक्किएर दुर्घटना भएका छन् । जंगलको बाटोको तीव्र गतिमा रहेका सवारी एकआपसमा ठोक्किएका हुन् ।

अक्सफोर्ड कलेजको बस, शव बोकेको बोलेरो भ्यान, चार मोटरसाइकल र एक स्कुटर पनि दुर्घटनाग्रस्त भएका हुन् । स्थानीयले सामाजिक सञ्जालमा राखेको तस्बिर र भिडियोमा दुर्घटना निकै भयानक देखिएको छ । दुर्घटनास्थलमा प्रहरी पुगिसकेको छ ।

स्थानीयले घाइतेको उद्धार थालिसकेका छन् । घाइतेहरूलाई स्थानीय अस्पताल पुर्याउने क्रम जारी छ । बस तीव्र गतिमा भएका कारण दुर्घटना भएको प्रत्यक्षदर्शीको भनाइ छ । घटनाको विस्तृत विवरण आउन बाँकी छ ।