काठमाडौँ । उपप्रधान तथा रक्षामन्त्री पूर्णबहादुर खड्काले जनतासँग गरिएका सबै प्रतिबद्धता पूरा हुने बताएका छन् । सोमबार सुर्खेत क्षेत्र नम्बर-२ को प्रथम क्षेत्रीय अधिवेशनको पन्चपुरी नगरपालिकाको बावियाचौरमा उद्घाटन गर्दै मन्त्री खड्काले सरकार निर्वाचनकै बेलाको गठबन्धनअनुसार बनेकाले जनतासँग गरिएका प्रतिबद्धता पूरा गर्नेगरि सरकारले काम गर्ने बताएका हुन् ।
उपप्रधानमन्त्री खड्काले शान्ति प्रक्रियालाई पूर्णता दिन, संविधानको सुदृढीकरण गर्न र देशको तीव्र विकासका लागि वर्तमान सरकारले काम गर्ने बताए । ‘संघ र प्रदेशको निर्वाचनमा जनतासँग हामीले मत माग्दा शान्ति प्रक्रियालाई पूर्णता दिन्छौं, संघीय लोकतान्त्रिक गणतन्त्रलाई सुदृढीकरण गर्छौं, तीव्र गतिमा देशको विकास गर्छौं भनेका थियौं,’ उनले भने, ‘चुनावका बेला मतदातासँग गरिएका बाचा अनुसारका कामहरू गर्न अहिलेको सरकार लागिरहेको छ ।’
द्वन्द्व पीडितहरूलाई न्यायिक निरूपणमार्फत न्याय दिने र आर्थिक प्याकेजमार्फत परिपूरण र राहत उपलब्ध गराइने मन्त्री खड्काको भनाई छ । उनले पुस १० गते बन्नुपर्ने सरकार चैत १७ गते बनेको बताउँदै यो बीचको समय खेर गएको बताए । उनले पुस १० को अप्राकृतिक गठबन्धन भत्केर प्राकृतिक गठबन्धन बनेको बताउँदै यसले देश र जनताका पक्षमा काम गर्ने जिकिर गरे ।
उपप्रधानमन्त्री खड्काले सरकारले अहिले सार्वजनिक गरेको न्यूनतम साझा कार्यक्रमको जगमा टेकेर बजेट ल्याउने बताए । कर्णालीमा भएका विकासका बहुआयामिक सम्भावनालाई सदुपयोग गर्दै विकासको गतिलाई तीव्र पार्नेगरि केन्द्रबाट विशेष बजेटको व्यवस्था गर्ने उनको भनाई छ ।
