रियल म्याड्रिडको प्रशिक्षण केन्द्रमा अभ्यासमा जुटे रोनाल्डो

काठमाडौँ । विश्वकपबाट बाहिरिएपछि नयाँ क्लबको खोजीमा रहेका क्रिस्टियानो रोनाल्डो प्रशिक्षणमा जुटेका छन् । मिडिया रिपोर्टका अनुसार रोनाल्डो ले रियल म्याड्रिडको भलडेबेबासस्थित प्रशिक्षण केन्द्रमा आफ्नो प्रशिक्षण शुरु गरेका हुन् ।

विश्वकपको शुरवातमा रोनाल्डोले म्यानचेस्टर युनाइटेडसँग विवाद हुदा सहमतिमा क्लबसँगको सम्झौता तोडेका थिए । अब रोनाल्डोको नयाँ क्लब बारे टुंगिन बाँकी रहेको बेला रियल म्याड्रिडको प्रशिक्षण केन्द्रमा आफ्नो अभ्यास शुरु गरेको स्पेनिस मिडियाहरुले उल्लेख गरेका छन् । रियल म्याड्रिडसँग राम्रो सम्बन्ध भएकै कारण रोनाल्डोलाई प्रशिक्षणका लागि आफ्नो प्रशिक्षण बेस दिएको बताइएको छ ।

३७ बर्षिय रोनाल्डोलाई साउदी अरबको क्लब अल नासरले अफर गरेपनि सो अफरमा रोनाल्डोले स्वीकृति नजनाएको रोनाल्डो आफैले विश्वकपको क्रममा बताएका थिए ।

अप्रत्याशित रुपमा विश्वकपको क्वाटरफाइनलमा मोरक्कोसँग पराजित हुदै बाहिरिएपछि अब रोनाल्डो कुन क्लबबाट खेल्छन भन्ने कौतुहलता बढिरहेका बेला उनले आफ्नो अभ्यास भने शुरु गरेका छन् ।