१० महिनामा भित्रियो ६४ अर्बकाे खाद्यान्न, सबैभन्दा बढी चामल आयात

नेपाललाई वर्षौंदेखि ‘कृषिप्रधान देश’ को रुपमा चिनाउँदै आइएको छ। तर व्यवहारमा भने नेपाल कृषिप्रधान देश बन्न सकेको छैन। भन्सार विभागको पछिल्लो तथ्याङ्कले यसलाई पुष्टी गरेको छ।

विभागका अनुसार चालु आर्थिक वर्ष २०७८/७९ को पहिलो दश महिनामा नेपालले ६४ अर्ब १० करोड ४२ लाख ३७ हजार रुपैयाँको धान, चामल, मकै र गहुँ विभिन्न देशबाट आयात गरेको छ। जबकी केही वर्षअघिसम्म नेपालले यी खाद्यान्न निर्यात गर्ने गर्थ्याे।

२०७८ साउनदेखि २०७९ वैशाख मसान्तसम्मको अवधिमा नेपालले उक्त मूल्य बराबरको धान, चामल, मकै र गहुँ आयात गरेको हो। सो अवधिमा विभिन्न देशबाट नेपालमा २६ अर्ब ४० करोड ८० लाख ३३ हजार रुपैयाँको चामल र १६ अर्ब ९ लाख ७१ हजार रुपैयाँकाे धान भित्रिएको छ।

सोही अवधिमा ६ अर्ब ३२ करोड ५२ लाख ९२ हजार रुपैयाँको गहुँ र १५ अर्ब ३६ करोड ९९ लाख ४१ हजार रुपैयाँकाे मकै नेपालले आयात गरेको विभागको तथ्याङ्कले देखाउँछ।

नेपालले पछिल्लो १० महिनामा १९ करोड १५ लाख ५७ हजार १८९ केजी गहुँ, ४२ करोड ५६ लाख २२ हजार ४०८ केजी मकै, ५२ करोड ७७ लाख ८१ हजार ८७७ केजी धान र ४९ करोड ९१ लाख २ हजार ३९१ केजी चामल आयात गरेको छ।