काठमाडौँ । स्पेनिस सुपर कोपाको उपाधि रियल म्याड्रिडले जितेको छ । गएराती साउदी अरबको रियादस्थित किङ फाहद इन्टरनेशनल स्टेडियममा सम्पन्न फाइनल खेलमा एथलेटिक बिल्बाओलाई २-० गोल अन्तरले पराजित गर्दै रियल म्याड्रिडले यो उपाधि जितेको हो ।
रियल म्याड्रिडको जितमा लुका मोड्रीच र करिम बेन्जमाले एक एक गोल गरेका थिए । मोड्रीचले खेलको ३८औँ मिनेटमा गोल गर्दै रियल म्याड्रिडलाई शुरुवाती अग्रता दिलाएका थिए भने खेलको ५२औं मिनेटमा पेनाल्टीबाट गोल गर्दै बेन्जमाले रियलको अग्रता दोब्बर पारेका थिए ।
यस खेलमा खेलको ८७औँ मिनेटमा रियल म्याड्रिडका एडर मिलिताओले रातो कार्ड पाएका थिए ।
योसहित रियल म्याड्रिडले स्पेनिस सुपर कोपाको उपाधि १२ पटक जितेको छ । यो उपाधि सबैभन्दा धेरै पटक भने बार्सिलोनाले जितेको छ । अहिलेसम्म बर्सिलोनाले सुपर कोपाको उपाधि १३ पटक जितेको छ ।
त्यस्तै एथलेटिक बिल्बाओ र डिपोर्टिभो ला कुरानाले ३-३ पटक यो उपाधि जितेका छन् ।
प्रतिकृया दिनुहॊस