उदयपुर । बेलका नगरपालिका ७ मैनामैनीमा भ्यान दुर्घटना हुँदा एकजनाको मृत्यु भएको छ भने तीन जना घाइते भएका छन्। आइतबार राति को १ ज १६१५ नम्बरको पिकअप गाडी दुर्घटना हुँदा बेलका नगरपालिका ७ मैनामैनीका अन्दाजी २३ वर्षीय मनोज राईको घटनास्थलमा मृत्यु भएको हो।

जिल्ला प्रहरी कार्यालय प्रमुख एसपी चन्द्रदेव राईका अनुसार दुर्घटनामा गम्भीर बेलका ७ मैनामैनीका २७ वर्षीय अम्बर राई र बेलका ८ का ३५ वर्षिय चरकुमारी राई गम्भीर घाइते भएका छन्। यसैगरी बेलका ७ की ३२ वर्षीय पिपलकुमारी राई सामान्य घाइते भएकी छिन्।

अम्बरको हात र छातीमा चोट लागेको छ भने चरकुमारीको टाउकोमा चोट लागेको प्रहरीको भनाइ छ। उनका अनुसार घाइतेहरूलाई बीपी कोइराला विज्ञान प्रतिष्ठान धरान पठाइएको छ। दुर्घटनाबारे थप अनुसन्धान भइरहेको प्रहरीको भनाइ छ।