काठमाडौं । हिमाली जिल्ला मनाङमा गएरातिदेखि परेको भारी हिमपातका कारण तिलिचो बेसक्याम्पमा अलपत्र परेका करिब ७५० जना पर्यटकको संयुक्त सुरक्षा टोलीले सफल उद्धार गरेको छ। नेपाली सेना, सशस्त्र प्रहरी बल र नेपाल प्रहरीको संयुक्त टोलीले प्रतिकूल मौसमका बाबजुद उद्धार कार्य सम्पन्न गरेको हो।
सशस्त्र प्रहरी बलका सहप्रवक्ता शैलेन्द्र थापाका अनुसार, उद्धार गरिएका पर्यटकहरूलाई मनाङको डिस्याङ गाउँपालिका-९ स्थित खाङसारमा ल्याइएको छ। अन्य ५० जना पर्यटकलाई भने तिलिचो बेसक्याम्पमै सुरक्षितसाथ राखिएको छ। खाङसारमा बसोबासको समस्या भएपछि उद्धार गरिएका पर्यटकहरूलाई सुरक्षित रूपमा फर्कने व्यवस्था मिलाइएको छ।
यसैबीच, तिलिचो तालबाट फर्कने क्रममा लेक लागेर बेहोस भएका काठमाडौं महानगरपालिका–३१ का ४५ वर्षीय वीरेन्द्र रसाइलीलाई सशस्त्र प्रहरी र नेपाल पर्वतीय उद्धार तालिम शिक्षालय मनाङको टोलीले खाङसारबाट हुम्डे स्वास्थ्य चौकीसम्म पुर्याएको छ।
मनाङमा सशस्त्र प्रहरी बलको पर्वतीय उद्धार तालिम शिक्षालय स्थापना भई उच्च भूभाग खोज तथा उद्धार तालिम सञ्चालन हुन थालेपछि हिमपात तथा अन्य विपद्मा परेका नागरिकहरूको उद्धारमा थप सहजता आएको अधिकारीहरूले बताएका छन्। हिमपातका कारण रोकिएका केही यात्रुहरू र पर्यटकहरूको सुरक्षित स्थानमा स्थानान्तरण र आवश्यक स्वास्थ्य सेवामा समेत सुरक्षाकर्मीहरूले सहयोग गरिरहेका छन्।
यो घटनाले हिमाली क्षेत्रमा जाँदा सुरक्षाका उपाय अपनाउन र मौसमको जानकारी राख्न थप सचेतना बढाएको छ।
