काठमाडौं । हाल देशभर मनसुनी वायु सक्रिय रहँदा विभिन्न स्थानमा वर्षा भइरहेको छ भने केही प्रदेशमा भारी वर्षाको सम्भावना रहेको छ । मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानमा नै रहेकाले मनसुनी गतिविधि देशभर नै सक्रिय देखिएको हो ।

बिहान: हाल बागमती प्रदेशलगायत देशका अधिकांश पहाडी भूभागमा मौसम सामान्यतया बदली रहेको छ भने तराईमा आंशिक बदली छ । बागमती, गण्डकी र मधेस प्रदेशका केही स्थानमा हल्कादेखि मध्यम वर्षा भइरहेको छ ।

दिउँसो: लुम्बिनी र सुदूरपश्चिम प्रदेशसहित देशको पहाडी भूभागमा मौसम सामान्यतया बदली रहनेछ । सुदूरपश्चिम प्रदेशलगायत देशका पहाडी भूभागका केही स्थानमा र लुम्बिनी प्रदेशका तराईका थोरै स्थानमा मेघ गर्जन र चट्याङसहित मध्यम वर्षाको सम्भावना छ ।

राति: कोशी, मधेस र सुदूरपश्चिम प्रदेशलगायत पहाडी भूभागमा मौसम सामान्यतया बदली रही तराईमा आंशिक बदली रहनेछ । यी प्रदेशका केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ ।

महाशाखाले आज दिउँसो बागमती र गण्डकी प्रदेशका पहाडी भूभागका एक-दुई स्थानमा भारी वर्षाको सम्भावना रहेको भन्दै विशेष सतर्कता अपनाउन आग्रह गरेको  छ । भारी वर्षाका कारण ती क्षेत्रका पहाडी भूभागमा पहिरो तथा गेग्रान बहावको जोखिम बढ्न सक्ने, नदी नाला तथा खहरे खोलाहरूमा पानीको सतह बढ्न सक्ने र त्यसले सडक तथा हवाई यातायातमा समेत सामान्य अवरोध ल्याउन सक्ने भएकाले आवश्यक सावधानी अपनाउन महाशाखाले अनुरोध गरेको छ ।