काठमाडौं । साताको दोस्रो कारोबार दिन सोमबार सेयर बजारमा लगानीकर्ताको उत्साहजनक सहभागिता देखिए पनि नेपाल स्टक एक्सचेन्ज (नेप्से) परिसूचक भने सामान्य अंकले घटेको छ। दिनभरिको उतारचढावपछि बजार बन्द हुँदा नेप्से परिसूचकमा झिनो करेक्सन देखिएको हो।

नेप्से आज २.०७ अंकले घटेर दुई हजार ९६२.१३ विन्दुमा सीमित भएको छ। यो गिरावटसँगै बजारले ३००० को मनोवैज्ञानिक विन्दुभन्दा केही तल नै आफ्नो स्थान बनाएको छ।

परिसूचक घटे पनि कारोबार रकम भने उत्साहजनक रह्यो। आज दिनभरमा कूल १९ अर्ब ३६ करोड ८ लाख रुपैयाँ बराबरका ४ करोड ४१ लाख कित्ता सेयर खरिदबिक्री भए। बजारमा बिक्रीचाप हाबी हुँदा आज कारोबारमा आएकामध्ये १५६ कम्पनीको शेयरमूल्य घटेको छ भने ९४ कम्पनीको मूल्यमा मात्र वृद्धि देखियो।

आज समता घरेलु लघुवित्त वित्तीय संस्थाको शेयरमूल्यमा १० प्रतिशतको सकारात्मक सर्किट लागेको छ। कारोबार रकमका आधारमा भने शिवम् सिमेन्ट अग्रस्थानमा रह्यो। कम्पनीको एक्लै ९२ करोड ५७ लाख रुपैयाँभन्दा बढीको शेयर किनबेच भयो, जसले बजारमा यस कम्पनीप्रतिको आकर्षणलाई देखाउँछ।