काठमाडाैं । अत्यधिक गर्मी र खडेरीको दोहोरो मारमा परेका पश्चिम चितवन र माडी क्षेत्रका बासिन्दाले आजदेखि दैनिक ६ घण्टासम्म विद्युत् कटौतीको सामना गर्नुपर्ने भएको छ । रोपाइँको समयमा आकासे पानी नपर्दा सिँचाइका लागि विद्युत्को माग ह्वात्तै बढेपछि नेपाल विद्युत् प्राधिकरणले भार व्यवस्थापन गर्न नसक्दा कटौतीको तालिका नै सार्वजनिक गरेको हो ।

नेपाल विद्युत् प्राधिकरण, चनौली वितरण केन्द्रले शनिबार एक सूचना जारी गर्दै माग र आपूर्तिबीच चरम असन्तुलन भएपछि विद्युत् आपूर्ति अवरुद्ध गर्नुपरेको जनाएको छ। केन्द्रका अनुसार, बिहान ३ घण्टा र दिउँसोदेखि साँझसम्म ३ घण्टा गरी विभिन्न फिडरमा फरक-फरक समयमा गरी कुल ६ घण्टा बत्ती जानेछ।

किन भयो विद्युत् कटौती?

प्राधिकरणका अनुसार, १३२/३३ केभी सबस्टेसनबाट आउने ३३ केभी ‘डग कन्डक्टर’ तारले अधिकतम ३०० एम्पियरसम्मको विद्युत् भार मात्रै धान्न सक्छ। तर, गर्मी र सिँचाइको चापका कारण हाल विद्युत् माग ४५० एम्पियरभन्दा बढी पुगेको छ। क्षमताभन्दा डेढ गुणा बढी भार परेपछि प्रणालीलाई सुरक्षित राख्न र थप क्षति हुन नदिन कटौती अनिवार्य भएको प्राधिकरणको भनाइ छ।

चनौली वितरण केन्द्रका प्रमुख राजकुमार श्रेष्ठले यो समस्या एक साताभित्र समाधान गर्ने प्रयास भइरहेको बताउनुभयो। नेपाल विद्युत् प्राधिकरण बागमती प्रदेश डिभिजन कार्यालयका प्रमुख जितेन्द्रकुमार झाले दीर्घकालीन समाधानका लागि अघिल्लो आर्थिक वर्षदेखि नै बसेनी सबस्टेसनबाट नयाँ ३३ केभी प्रसारण लाइन निर्माणको काम भइरहेको जानकारी दिनुभयो।

विद्युत् कटौती हुने समय तालिका:

प्राधिकरणले विभिन्न फिडरका लागि निम्नानुसारको तालिका सार्वजनिक गरेको छ:

• नारायणी–माडी फिडर:

  • बिहान ६:०० बजेदेखि ९:०० बजेसम्म

  • दिउँसो ३:०० बजेदेखि ६:०० बजेसम्म

• मेघौली–विजयनगर–शुक्रनगर फिडर:

  • बिहान ९:०० बजेदेखि १२:०० बजेसम्म

  • बेलुका ६:०० बजेदेखि ९:०० बजेसम्म

• जगतपुर–रामपुर फिडर:

  • दिउँसो १२:०० बजेदेखि ३:०० बजेसम्म

  • बेलुका ९:०० बजेदेखि १२:०० बजेसम्म