काठमाडौं। भिजिट भिसा काण्डको चपेटामा परेका गृहमन्त्री रमेश लेखकको राजीनामाको माग गर्दै संसद अवरुद्ध भएपछि नेकपा एमाले र नेपाली कांग्रेस शीर्ष तहमा छलफलमा जुटेका छन् । संसदको गतिरोध अन्त्यका लागि नेपाली कांग्रेसका सभापति शेरबहादुर देउवा, गृहमन्त्री लेखक र स्वास्थ्य तथा जनसंख्यामन्त्री प्रदीप पौडेल बिहान प्रधानमन्त्री केपी शर्मा ओलीलाई भेट्न बालुवाटार पुगेका हुन् ।

छलफलको मूल विषय गृहमन्त्रीको राजीनामासँगै बजेट सत्र सुचारु गर्ने उपायमाथि केन्द्रित भएको स्रोतले जनाएको छ । विपक्षी दलहरूले गृहमन्त्रीले पद नछाडेसम्म संसद सञ्चालन हुन नदिने अडान लिएका छन्। सरकार भने जेठ १५ गते भोलि आर्थिक वर्ष २०८२/८३ को बजेट प्रस्तुत गर्न संवैधानिक रूपमा बाध्य अवस्थामा पुगेकाले संसद चलाउने सहमति खोज्न दबाबमा छ ।

यसैबीच, संसद बैठक आज बिहान ११ बजेका लागि बोलाइएको छ । बैठकअघि प्रमुख दलहरूबीच सहमति जुटाउने प्रयास जारी छ ।