पेट्रोलियम पदार्थको मूल्य घट्यो, नयाँ मूल्य कति ?

काठमाडाैं । नेपाल आयल निगमले पेट्रोलियम पदार्थको भाउ घटाएको छ । निगमले पेट्रोल र डिजेल तथा पेट्रोलमा प्रति लिटर दुई रुपैयाँ घटाएको हो ।

निगमका अनुसार अब पेट्रोलको मूल्य प्रतिलिटर ११२ रुपैयाँ पर्नेछ । यसअघि प्रतिलिटर ११४ रुपैयाँ थियो । यसैगरी डिजेल तथा मट्टितेल प्रतिलिटर ९९ रुपैयाँ कायम भएको छ । यसअघि प्रतिलिटर १०१ रुपैयाँ थियो । अन्तर्राष्ट्रिय बजारमा पेट्रोलियम पदार्थको मूल्य निकै घटेपनि नेपालमा नघटाइएको भन्दै आलोचना भएको थियो ।

२०७१ सालमा स्वचालित मूल्य कार्यान्वयमा आएसँगै प्रत्येक १५ दिनमा पेट्रोलियम पदार्थको भाउ घटबढ गराउने भनिए पनि निगमले त्यसलाई कार्यान्वयन गर्न आलटाल गर्ने गरेको छ । नयाँ मूल्यअनुसार पेट्रोलमा ११ रुपैयाँ ४४ पैसा र डिजेलमा प्रति लिटर ५ रुपैयाँ ८१ पैसा नाफा छ ।

एलपी ग्यासमा भने निगमलाई प्रतिसिलिण्डर २८४ रुपैयाँ ८३ पैसा नोक्सान छ । मूल्य समायोजनपश्चात अबको १५ दिनमा निगमलाई ५६ करोड ५८ लाख रुपैयाँ नोक्सान हुने उसले जनाएको छ ।