पशुपति कोटिहोममा आयोजकलाई घाटा

• स्वयंसेवकलाई सवा चार करोड, मिडियामा एक करोड आठ लाख खर्च भएको दाबी

काठमाडौँ । पशुपति मन्दिरमा एक महिनासम्म चलेको कोटिहोममा आम्दानी भन्दा खर्च धेरै भएको विवरण सार्वजनिक भएको छ । कोटीहोम सकिएको झण्डै दुई महिनापछि आयोजक विजय कृष्णमुर्तिले विहीबार पत्रकार सम्मेलन गर्दै आय–व्यय विवरण सार्वजनिक गरेका हुन् ।

आयोजक कृष्णमुर्तिले ‘ऐतिहासिक श्री पशुपति कोटिहोम एवम् १०८ श्रीमद्भागवत विश्व कल्याण मासिक ज्ञान महायज्ञ’ लगाउँदा घाटा भएको दाबीसहितको हिसाबकिताब सार्वजनिक गरेका छन् । कृष्णमुर्तिका अनुसार कोटीहोममा कुल २० करोड १५ लाख ८२ हजार ४९० रुपैयाँ १५ पैसा बराबर नगद र द्रव्य दान संकलन भएको थियो ।

यस्तै, कोटीहोमका लागि २० करोड ८८ लाख ३२ हजार ७९४ रुपैयाँ ३८ पैसा खर्च भएको उनले बताए । यस अनुसार ७२ लाख ५० हजार ३०४ रुपैयाँ घाटा भएको कृष्णमुर्तिले दावी गरेका छन् । उनले आफूलाई ७२ लाख ५० हजार बढी ऋण लागेको बताएका छन् । कृष्णमुर्तिका अनुसार सबैभन्दा बढी खर्च स्वयंसेवकका लागि भएको छ ।

‘स्वयंसेवक’ शब्दले भुक्तानी नलिइकन गरिने सेवा हो । तर, आफूले स्वयंसेवकलाई मात्रै ४ करोड २६ लाख ५३ हजार ५० रुपैयाँ भुक्तानी दिएको कृष्णमुर्ति बताएका छन् । मिडियामा एक करोड आठ लाख खर्च भएको उनको दाबी छ ।