प्राइम कलेज र एसियन इन्स्टिच्युट अफ टेक्नोलोजीबीच शैक्षिक सहकार्य गर्ने साझेदारी

काठमाडौं । प्राइम कलेजले थाइल्यान्डको एसियन इन्स्टिच्युट अफ टेक्नोलोजी (एआईटी) सँग साझेदारी गरेको छ। दुई शैक्षिक संस्थाहरूबीच विभिन्न शैक्षिक कार्यक्रममा सहकार्य गर्ने साझेदारी भएको हो।

यसअनुसार प्राइम कलेजको शैक्षिक उत्कृष्टताप्रति प्रतिबद्धतालाई अगाडि बढाई विद्यार्थीहरूलाई असाधारण शैक्षिक अवसरहरू र विश्वव्यापी परिप्रेक्ष्यहरू प्रदान गर्ने कलेजले जनाएको छ।

‘यस साझेदारीले विद्यार्थीहरूलाई संयुक्त स्नातक र स्नातकोत्तर कार्यक्रमका दुबै डिग्रीहरू छ वर्षभन्दा कम समयमै पूरा गर्न सक्षम बनाउने एक अद्वितीय अवसर प्रस्तुत गर्दछ’. प्राइम कलेजले भनेको छ, ‘यस द्रुतमार्गले विश्वस्तरीय शिक्षा र महत्वपूर्ण आर्थिक सहयोग प्रदान गर्दछ जसमा विद्यार्थीहरूले एआईटीमा आफ्नो ट्युसनमा ५० प्रतिशतभन्दा बढी छात्रवृत्ति प्राप्त गर्न सक्दछन्।’

यस पहलले विद्यार्थीहरूलाई आफ्नो स्नातक डिग्री पूरा गरेलगत्तै मास्टरको अध्ययन सुरु गर्न अवसर दिने र यसबाट विद्यार्थीहरू उन्नत शैक्षिक र व्यावसायिक क्षेत्रहरूमा सहजै प्रारम्भिक प्रवेशको सुविधा प्रदान गर्ने कलेजको भनाइ छ।

एआईटीको विशिष्ट संकाय र अत्याधुनिक अनुसन्धान सुविधाले प्राइम कलेजका विद्यार्थीहरूलाई अनुपम शैक्षिक मार्गदर्शन प्रदान गर्ने पनि उल्लेख गरिएको छ।

एआईटीका अन्तर्राष्ट्रिय विद्यार्थीसँगको अन्तर्क्रियासँगै आफ्ना विद्यार्थीहरूलाई विभिन्न संस्कृतिहरूसँग परिचित गराउने, शैक्षिक अनुभवलाई समृद्ध बनाउने र विश्वव्यापी मानसिकतालाई बढावा दिने प्राइमले जनाएको छ।