काठमाडौँ । बन्दकर्ताले काठमाडौँ उपत्यकाका विभिन्न स्थानमा गरी तीन वटा सार्वजनिक बसमा तोडफोड गरेका छन् । नेपाल यातायातको बा ४ ख ९०८९ नम्बरको बस थापा गाउँमा, कोटेश्वरमा महानगर यातायातको बा ४ ख ९३९४ नम्बरको बस र कोटेश्वरबाट बालकुमारी जाँदै गरेको बा ३ ख ७९०६ नम्बरको हाइस तोडफोड भएको हो ।
तोडफोडमा उत्रिएका २ जनालाई नयाँ बानेश्वर र कोटेश्वरबाट पक्राउ गरिएको प्रहरीले जनाएको छ । नेपाल प्रहरीका केन्द्रीय प्रहरी प्रवक्ता टेकप्रसाद राईकाअनुसार उपत्यकामा नेपाल बन्द गराउन सडकमा निस्केका २० जनालाई प्रहरीले पक्राउ गरेको छ । बिहान शंकास्पद रूपमा निस्केका १८ जनालाई पक्राउ गरिएको हो ।
काठमाडौँको लगनटोल, माछापोखरी र बसपार्कबाट १७ जनालाई पक्राउ गरिएको छ । बानेश्वर, कोटेश्वर र ललितपुरबाट ११ जना पक्राउ परेका हुन् । काठमाडौँबाट पक्राउ परेकाहरूलाई भृकुटीमण्डप स्थित नगर प्रहरीको कार्यालयमा राखिएको छ ।
नेत्रविक्रम चन्द ‘विप्लव’ नेतृत्वको नेकपासहित चार दलले आज नेपाल बन्दको घोषणा गरेका छन् । नेपाल कम्युनिस्ट पार्टीका अध्यक्ष विप्लव, ऋषि कट्टेल नेतृत्वको नेपाल कम्युनिस्ट पाटीका अध्यक्ष ऋषि कट्टेल, वैज्ञानिक समाजवादी कम्युनिस्ट पार्टी नेपालका आहुती र नेकपा माओवादी समाजवादीका महासचिव कर्णजितले संयुक्त विज्ञप्ति निकालेर नेपाल बन्दको आह्वान गरेका थिए ।
