ईरफ़ान खानको सम्मानमा “ए चरी” बोलको गीत सार्वजनिक

काठमाडौँ। चर्चित कलाकार ईरफान खानको सम्मानमा आर्ट्माण्डुले आफ्नो नयाँ गीत समर्पण गरेको छ।  “ए चरी, एन ओड टु ईरफ़ान खान” बोलको उक्त गीत आर्ट्माण्डुको आफ्नो युट्युब च्यानल मार्फत सार्वजनिक गरिएको हो।

गीतको रचना अन्वेश थुलुङ्ग् राईले गरेका हुन् भने स्वर तथा संगीत अंकित बाबु अधिकारीको रहेको छ।
ईरफान खान गत २९ अप्रिलमा मुम्बईको कोकिलाबेन अस्पतालमा क्यान्सर रोगको उपचारका क्रममा दिवंगत भएका ईरफ़ान आफैँ संघर्ष गरेर बलिवुड हुँदै हलिवुड सम्मको लामो यात्रा तय गर्न सफल भएका कलाकार हुन्।  यस अर्थमा उनको पुरै जीवननै एक चरीको जस्तै स्वतन्त्र थियो ।

“ईरफ़ान खान मेरो जीवनमा धेरै ठुलो महत्व बोकेका कलाकार हुन् ।  उनको देहावसान पछि मलाई उनलाई एउटा गीत समर्पण गर्न इच्छा लाग्यो ।  यति कम समयमा हाम्रो मिहिनेतले यो गीत सार्वजनिक गर्न लागेका छौं। यसमा म एकदमै खुशी छु, ” गीतका रचनाकार थुलुङ्ग्ले भने  गीतको संगीत संयोजन रोमी बस्नेतले गरेका हुन् भने कोविद बज्रको ध्वनी सम्मिश्रणमा गीत आर्ट्माण्डुको आफ्नै स्टुडियोमा निर्माण भएको हो ।

यस गीतका गायक तथा संगीतकार अंकित बाबु अधिकारीका थुप्रै गीत बजारमा आइसकेका छन् । उनका राम-नाम, सम्झनालाई, मायामा लगायतका गीत चर्चित छन् । अधिकारी नेपाली तारा-३ को टप ८ सम्म पुग्न सफल भएका थिए ।

आर्ट्माण्डुले विगतमा पनि यस्तै अर्थपुर्ण सृजनाहरु नेपाली कला क्षेत्रमा पस्किंदै आएको छ । आर्ट्माण्डुबाट निर्माण भएका केही चर्चित म्युजिक भिडियोहरुमा विपिन कार्की अभिनित “बटौली”, अंकित बाबु अधिकारीकै “सम्झनालाई” र नवीन चौहान निर्देशित “लुकिछिपी किन मायामा” पर्छन।  लुकिछिपी किन मायामा बोलको गीतले गत २१ औं टुबोर्ग इमेज अवार्डमा तीन मनोनयन मध्यमा “सर्वोत्कृष्ट म्युजिक भिडियो” तथा “सर्वोत्कृष्ट म्युजिक भिडियो निर्देशक” गरि दुई अवार्ड हात पार्न सफल भएको थियो ।

आर्ट्माण्डु नेपाल प्रा. लि. ले गत तीन वर्ष देखि विभिन्न विधामा अडियो-भिडियो निर्माण गर्दै आइरहेको छ।