काठमाडाैं । माछापुच्छ्रे बैंकले काठमाडौंको महाराजगञ्जस्थित देशकै ठूला अस्पतालमध्ये एक, त्रिभुवन विश्वविद्यालय शिक्षण अस्पतालमा आफ्नाे १२औँ एक्सटेन्सन काउन्टर सञ्चालनमा ल्याएको छ। अस्पतालमा उपचार तथा सेवा लिन आउने सेवाग्राहीहरूको सुविधा र सहजतालाई मध्यनजर गर्दै बैंकले उक्त काउन्टर सञ्चालनमा ल्याएको हो।
शिक्षण अस्पतालमा बैंकको एक्सटेन्सन काउन्टर निर्माण गरी सञ्चालनमा ल्याउनका लागि सम्झौता पत्रमा द्विपक्षीय हस्ताक्षर गरिएको छ। सम्झौतामा त्रिभुवन विश्वविद्यालय शिक्षण अस्पतालका तर्फबाट कार्यकारी निर्देशक डा. सुवास प्रसाद आचार्य तथा बैंकका तर्फबाट प्रमुख कार्यकारी अधिकृत सन्तोष कोइरालाले हस्ताक्षर गरेका थिए ।
सम्झौता पश्चात् अस्पतालले उपलब्ध गराएको स्थानमा बैंकले आवश्यक संरचना निर्माण गरी काउन्टर सञ्चालनमा ल्याउनेछ। यसअघि अस्पताल परिसरमा एटिएम जडान गरी सेवा प्रवाह गर्दै आएको बैंकले उक्त काउन्टरमार्फत शिक्षण अस्पतालमा आउने बिरामीहरूले उपचारका क्रममा बिल भुक्तानी तथा रेमिट्यान्स सेवा लगायतका विभिन्न बैंकिङ कारोबारहरू सहज रूपमा प्राप्त गर्न सक्नेछन्।
बैंकले सरकारी तथा सार्वजनिक निकायहरूलाई अत्याधुनिक बैंकिङ सेवा प्रदान गर्ने अभियानमा थप एक महत्वपूर्ण पहल लिएको छ। माछापुच्छ्रे बैंकले त्रिभुवन विश्वविद्यालय शिक्षण अस्पतालमा सेवाग्राही तथा अस्पतालका आर्थिक कारोबारलाई डिजिटलाइज गर्न सहयोग पुर्याउनेछ।
