रौतहट । रौतहटमा रहेको बाबा बैजुनाथ सुगर एण्ड केमिकल इन्डस्ट्रिज (चिनी मिल) ले यस बर्ष २० लाख क्विन्टल उखु क्रसिङ गर्ने लक्ष्य राखेकाे छ ।
मिलले गत वर्ष पौने १३ लाख क्विन्टल उखु क्रसिङ गरेको थियाे भने, यस वर्ष १८ देखि २० लाख क्विन्टलसम्म उखु क्रसिङ गर्ने लक्ष्य लिएकाे हो ।दैनिक २० हजार क्विन्टल उखु क्रसिङ क्षमता रहेकोमा यस वर्ष त्यसलाई बढाएर २५ हजार क्विन्टल पुर्याइएकाले लक्ष्य अनुसार उखु क्रसिङ हुने मिल संचालक बैजु प्रसाद बाबराले जानकारी दिए । बाबराका अनुसार डोंगाको पूजा गरिसकेकाले अबको एक हप्तापछि मिलबाट उखु क्रसिङ हुनेछ ।
कटहरिया नगरपालिका–८ डुमरियामा सञ्चालित सो उद्योगमा रौतहट सहित छिमेकी जिल्लाका किसानले पनि उखु दिने गरेका छन् । १५ दिनभित्र नै किसानबाट खरिद गरिएको उखुको भुक्तानी गर्ने व्यवस्था रहेकाे मिल संचालक बाबराले बताए ।उखु बिक्री गरेवापतको भुक्तानी समयमा नै प्राप्त हुने भएकाले पनि प्रत्येक वर्ष जिल्लामा उखु खेती गर्ने किसानहरूको संख्या बढ्दै गएको उनले जानकारी दिए । यद्यपि पछिल्लो समय चिनी मिलले प्रयाप्त मात्रमा उखु नपाएका कारण लक्ष्य भन्दा कम क्रसिङ हुने गरेको तथ्याङले देखाएकाे छ ।
मिल प्रशासनले उखु खेतीप्रति किसानहरूको आकर्षण गराउन नयाँ प्रजातिका बीउ उपलब्ध गराउने व्यवस्था गरेकाे छ । नयाँ प्रजातिका उखुको बीउ प्रयोग गर्दा प्रति कठ्ठा ३० देखि ५० क्विन्टलसम्म उखु उत्पादन हुन सक्ने अपेक्षा गरिएको छ । साथै, उद्योगले किसानलाई उखु खेती सम्बन्धी विभिन्न सहयोग र प्राविधिक परामर्शसमेत प्रदान गर्दै आएको छ ।
