काठमाडौं । नेपाली कांग्रेसको आसन्न १५ औं महाधिवेशनमा महामन्त्री पदको प्रतिस्पर्धाले सबैको ध्यान खिचेको छ। यसपटकको दौडमा एउटा नाम विशेष चर्चामा छ: नैनसिंह महर। विगत तीन वर्षदेखि निरन्तर महामन्त्रीको तयारीमा जुटेका महरको पक्षमा पार्टीभित्र देखिएको अभूतपूर्व जनमतले उनी महाधिवेशनमा ‘अनलॉक’ हुने संकेत गरेको छ। पार्टीका हरेक तहका कार्यकर्ता र आम सदस्यमाझ महरले जुन किसिमको विश्वास र लोकप्रियता कमाएका छन्, त्यसले महामन्त्रीको दुई सिटमध्ये एकमा उनको जीत करिब-करिब सुनिश्चित भइसकेको विश्लेषण भइरहेको छ।
उनको यो सशक्त उपस्थितिले गर्दा अबको प्रतिस्पर्धा केवल बाँकी एक सिटमा मात्र हुने अनुमान गरिएको छ। महरले आफ्नो महामन्त्री यात्रालाई केवल चुनावी एजेन्डाका रूपमा मात्र लिएनन्। तीन वर्षअघिदेखि नै उनले देशव्यापी संगठन निर्माणमा ध्यान दिए। कार्यकर्ता भेटघाट, प्रदेशदेखि वडासम्मका संरचनामा सक्रिय सहभागिता र पार्टीका हरेक गतिविधिमा उनको उपस्थिति प्रशंसनीय रह्यो।
यही लगनशीलताका कारण उनले कांग्रेसको युवा पंक्तिदेखि पाका नेताहरूसम्मको विश्वास जित्न सफल भएका छन्। नेपाली कांग्रेसभित्र लामो समयदेखि युवा र गतिशील नेतृत्वको आवश्यकता महसुस गरिएको थियो। नैनसिंह महरले आफूलाई सोही ‘युवा’ अनुहारका रूपमा स्थापित गर्न सफल भएका छन्। उनको तार्किक प्रस्तुति, पार्टीको विचार र सिद्धान्तमाथि स्पष्ट पकड तथा भविष्य उन्मुख दृष्टिकोणले उनलाई धेरैको नजरमा आशाको किरण बनाएको छ।
महरको बलियो दाबेदारीले महामन्त्रीका अन्य आकांक्षीहरूका लागि चुनौती खडा गरेको छ। दुई सिटमा प्रतिस्पर्धा हुने भएपनि महरको उपस्थिति यति दह्रो छ कि अब बाँकी एक सिटमा मात्र दर्जनौं नेताहरूले आफ्नो भाग्य लेख्नुपर्ने अवस्था आएको छ। यसले कांग्रेसभित्र आन्तरिक बहस र समीकरण निर्माणलाई थप तीव्र बनाउनेछ। महाधिवेशन नजिकिँदै गर्दा नैनसिंह महरको पक्षमा देखिएको यो जनलहरले कांग्रेसको भावी नेतृत्वमा उनको महत्वपूर्ण भूमिका रहने स्पष्ट संकेत गर्दछ। उनको यो ‘अनलॉक’ यात्राले कांग्रेसको राजनीतिक भविष्यमा कस्तो प्रभाव पार्नेछ, त्यो हेर्न बाँकी नै छ। तर अहिले महर महामन्त्रीको दौडमा एक प्रमुख र बलिया दाबेदारका रूपमा अगाडि बढेका छन्। नैनसिंह महरसंगै अर्को महामन्त्री को बन्ला ? यो प्रश्न अहिले निकै रोचक र सार्थक हुने देखिएको छ ।
