भारतको एक भवनमा आगलागी, २० जनाको मृत्यु

भारतको नयाँ दिल्लीस्थित एक भवनमा भएको आगलागीमा कम्तीमा पनि २० जनाको ज्यान गएको छ। भारतीय राजधानी नयाँ दिल्लीको मुन्डका मेट्रो स्टेशनमा रहेको एक भवनमा शुक्रबार राति आगो लागेको थियो। त्यस आगलागीमा अरु कम्तीमा पनि ४० जना जलेर घाइते भएका छन्। ती घाइतेमध्ये अधिकांशको अवस्था गम्भीर रहेको बताइएको छ।

उनीहरुलाई अस्पताल भर्ना गरिएको छ। भर्ना भएकाहरुको अवस्था कतिपयको गम्भीर रहेकाले यस दुर्घटनामा परेर ज्यान जानेको संख्या बढ्न सक्ने पनि अधिकारीहरुले जनाएका छन् । सो भवन ठूलो थियो र यहाँ कैयाैं कम्पनीका कार्यालयहरु पनि रहेका छन्। यो भवनको दोस्रो र तेस्रो तल्लाबाट मात्र २० वटा शव फेला पारिएको छ भने अरुतिर खोजी कार्य हुँदैछ ।

यहाँ कम्तीमा पनि २४ वटा अग्निनियन्त्रक परिचालन गरिएको छ। ठूलो भवन र धेरै नागरिकहरु त्यहाँ रहेकाले यस आगलागीबाट ठूलो क्षति पुग्नसक्ने बताइएको छ । यो आगलागीको कारण भने पत्ता लागेको छैन। विद्युत सर्ट भएकाले आगो लागेको हुनसक्ने प्रारम्भिक जानकारी प्रहरीले दिएको छ। तर यसको कारणका बारेमा थप अनुसन्धान भइरहेको बताइएको छ। भारतका राष्ट्रपति रामनाथ कोभिन्दले सो आगलागीको घटनाप्रति दुःख व्यक्त गरेका छन् ।