कोरोना प्रकोप : इटालीमा एकैदिन ८८९ जनाको मृत्यु, विश्वभर मृत्यु हुनेको संख्या ३० हजार नाघ्यो

सबैभन्दा बढी इटालीमा मृत्यु हुनेको संख्या १० हजार नाघेको छ । त्यहाँ शनिबार मात्रै थप ८८९ जनाको मृत्यु भएको इटालीको सिभिल प्रोटेक्सनले जनाएको छ । आइतबार बिहानसम्म इटालीमा मृत्यु हुनेको संख्या १० हजार २३ पुगेको छ भने संक्रमितको संख्या ९२ हजार ४ सय ७२ पुगेको छ ।

अमेरिकामा पनि पछिल्लो २४ घण्टामा अमेरिकामा ५१५ जनाको मृत्यु भएको छ भने थप १९ हजार ३ सय २ जनामा संक्रमण देखिएको छ । बिहानसम्म अमेरिकामा कोरोना संक्रमणबाट मृत्यु हुनेको संख्या २ हजार २ सय ११ पुगेको छ भने संक्रमितको सख्या एक लाख २३ हजार नाघेको छ ।

स्पेनमा पनि थप ८४४ जनाको मृत्यु भएको छ भने थप ७ हजार ५ सयभन्दा बढीमा संक्रमण देखिएको छ । स्पेनमा मृत्यु हुनेको संख्या ५ हजार ९ सय ८२ पुगेको छ । ७३ हजार २ सय ३५ संक्रमित छन् । पछिल्लो २४ घण्टामा फ्रान्समा ३२४, बेलायतमा २६०, इरानमा १३९, जर्मनीमा ८२,नेदरल्यान्ड्समा ९३, बेल्जियममा ६४ र स्विजरल्यान्डमा ३३ जनाको मृत्यु भएको छ ।