स्वास्थ्य उपकरण ल्याउन निजी क्षेत्रलाई आह्वान

काठमाडौं ।  सरकारले अन्तर्राष्ट्रिय बजारबाट औषधि र आवश्यक स्वास्थ्य उपकरण ल्याउन निजी क्षेत्रलाई आह्वान गरेको छ। सरकारले व्यवसायीलाई शनिबारभित्र आपूर्ति गर्ने गरी आवश्यक प्रक्रिया मिलाउन भनेको हो। यो विषयमा सरकारले बुधबार व्यवसायीसँग छलफल गर्न लागेको छ।

कोरोना(कोभिड–१९) रोकथाम र नियन्त्रणका लागि स्वास्थ्यकर्मीले प्रयोग गर्ने व्यक्तिगत सुरक्षात्मक उपकरण (पीपीई), कोरोना परीक्षणका लागि आवश्यक किटलगायत अत्यावश्यक उपकरण र औषधि ल्याउनुपर्नेछ। कोभिड–१९ संक्रमण रोकथाम तथा नियन्त्रण उच्चस्तरीय समितिको मंगलबार बसेको बैठकले आवश्यक स्वास्थ्य उपकरण बजारमा आपूर्ति नहुने र सरकारी तयारी गर्दा केही समय विलम्ब हुन सक्ने ठानी निजी क्षेत्रलाई आह्वान गरेको हो।

सरकारका प्रवक्ता तथा अर्थमन्त्री डा.युवराज खतिवडाले अन्तर्राष्ट्रिय क्षेत्रबाट जसले स्वास्थ्यसम्बन्धी उपकरण ल्याउन सक्छ त्यस्ता व्यवसायीलाई निश्चित दिनभित्र ल्याउने गरी आह्वान गर्ने निर्णय सरकारले गरेको बताए। ‘निजी क्षेत्रका व्यवसायीलाई हामीले आवश्यक स्वास्थ्य उपकरणलगायत औषधि ल्याउन आह्वान गर्ने निर्णय गरेका छौं’, उनले भने, ‘उहाँहरूले कति दिनभित्र ल्याउन सक्नुहुन्छ, शनिबारभित्र ल्याउन सक्ने गरी आह्वान गर्ने र आपूर्ति सहज बनाउने निर्णय सरकारले गरेको छ।’

त्यस्ता व्यवसायीलाई औषधि तथा स्वास्थ्य उपकरण ल्याउन यातायातले अप्ठ्यारो नपर्ने पनि सरकारले प्रतिबद्धता जनाएको छ। ‘जसले औषधि तथा स्वास्थ्यसम्बन्धी उपकरण ल्याउन सक्छन्, त्यस्ता निजी क्षेत्रका व्यवसायीलाई हवाई साधन चाहिन्छ भने त्यसको व्यवस्थापन पनि सरकारले गर्नेछ’, उनले भने।

आवश्यक औषधि तथा स्वास्थ्य उपकरणको सूची सरकारले तयार पारिसकेको र त्यसकै आधारमा व्यवसायीलाई आह्वान गरिएको खतिवडाको भनाइ छ।

चीन र भारतसँग पीपीई, किटलगायत स्वास्थ्य उपकरण ल्याउने विषयमा परराष्ट्र र अर्थ मन्त्रालयले सम्बन्धित देशका नेपाली दूतावाससँगको समन्वयमा प्रयास गरिरहेका छन्। यही बेला सरकारले निजी क्षेत्रलाई पनि अन्तर्राष्ट्रिय बजारबाट स्वास्थ्य उपकरण र औषधि ल्याउन प्रोत्साहन गरेको हो।

सरकारी तवरबाट उपकरण खरिदका लागि विभिन्न प्रक्रिया पूरा गराउँदा समय लाग्ने देखेपछि सरकारले निजी क्षेत्रलाई आफ्नो अन्तर्राष्ट्रिय बजारको सम्पर्कबाट पारदर्शी र छोटो समयमा ल्याउन आह्वान गरिएको मन्त्री खतिवडाले बताए।

कोरोना संक्रमण भएका व्यक्तिको उपचारमा खटिने स्वास्थ्यकर्मीलाई पीपीई अत्यावश्यक छ। यसअन्तर्गत मास्क, हेल्मेट, हेडकभर, बुट, गाउन, पञ्जा, चस्मा आदि पर्छन्।

बिरामीको सीधा सम्पर्कमा रहने चिकित्सकलाई यी सामग्री नियमित रूपमा आवश्यक पर्ने भएकाले सञ्चित सामग्री कम छ। केही दिनभित्र ती सामग्री अभाव हुन सक्ने ठानेपछि सरकारले खरिद प्रक्रिया सुरु गरेको हो। पीपीईको पनि प्रथम, दोस्रो र तेस्रो, पीसीआर टेस्ट किट, भीटीएम, इन्फ्रारेड थर्माेमिटर, एन ९५ मास्क, सर्जिकल ग्लोब्स, अक्सिजन प्लान्ट, ल्याबसहितको एम्बुलेन्सजस्ता सामग्रीको सूची नेपालले तयार पारेको छ।

पीपीईले स्वास्थ्यकर्मीलाई हुन सक्ने संक्रमण तथा जोखिमबाट सुरक्षा प्रदान गर्छ। सरकारले यी स्वास्थ्य उपकरणबारे चीन र भारतसँग सहयोग मागेको छ। चीनले मंगलबार पनि नेपालको साथमा चीन रहेको बताएको छ। चिनियाँ राजदूत होउ यान्छीले चीनले नेपाललाई स्वास्थ्य सामाग्री उपलब्ध गराउने तयारी गरिरहेको बताएकी छन्। चीनले नेपाललाई चिकित्सा उपकरणमा सहयोग गर्न तयार रहेको सन्देश दिँदै आएको छ।

सरकारले कोरोना संकमितको परीक्षणका लागि वीर अस्पताल र बीपी केयरमा यन्त्र–उपकरण जडान गर्ने र टेस्ट ल्याब स्थापना प्रदेशस्तरमै गर्ने तयारीमा पनि सरकार लागेको छ।

अन्नपूर्ण पोस्ट

बारेमा news

यॊ पनि हेर्नुहॊस

पछिल्लो २४ घण्टामा थप ८२ जनामा कोरोना पुष्टि

काठमाडौं । आज आइतबार थप ८२ जनामा कोरोना संक्रमण पुष्टि भएको छ । स्वास्थ्य मन्त्रालयका …

प्रतिकृया दिनुहॊस